Vo La Paz simmer en ganze Tag mitem Bolivia Hop Bus uf Puno gfahre. Die leider immerno chranki Arlette hemmer mitgschleppt. Sie hett sich gege en Direktflug nach Cusco entschiede gha. Sie isch aber ned schlecht im chrank sii, sie cha nämli sogar imene chranke Zuestand no Witz risse, mega starch! Bolivia Hop hett en Stop in Copacabana gmacht, damit mir no uf de berüehmti Titicaca-See, wo de höchschti befahrbari See vo de Welt isch (3‘850 MüM), chönd gah. De riesigi See, wo en Viertel vo de Schwiiz usmacht flächemässig, wird gemäss vertrauenswürdige Quelle namens Papi vo Uriwohner bewohnt, wo glaubs in Strohhüser wohned und i Strohboot über de See fahred. Die hemmer welle go bsueche. Mir hend innerhalb vo wenige Stunde die ganz Reis durebuecht und die Strohläbe-Reis au. Da chönd eim au Fehler passiere und mir hend die falschi Tour am falsche Tag buecht.
Ich ha das erscht gmerkt, wo dTour scho fascht fertig gsi isch und ich immer nach Strohsache Usschau ghalte ha. Mir hend 45 Minute gha zum die Isole de Sol zbesichtige und hend denn wieder müesse am gliiche Ort oder uf de andere Siite vo de Insle zruggsii. Da mir chli langsam unterwegs gsi sind (es hett so viel Lamas und Alpacas gha zum bestuune), simmer wieder umgkehrt, damit mir mitem Boot wieder innerhalb vo 1.5 Std zrugg uf Copacabana chönd, wo euse Bus mit eusem Gepäck warted zum wiiter uf Puno zreise. Mir sind 3 Minute zspat gsi und euses Boot isch nirgends in Sicht gsi. Au kei anderi Tourischte, usserd es Mexikanisch/Amerikanischs-Päärli wo eus nachem Treffpunkt gfrögt hett und eus gfolgt isch. Leider hend mir all de Bootsfahrer falsch verstande und mir hätted uf de andere Siite selle warte. Möglichi Szenene sind mir dur de Chopf: Wenn jetzt würkli keis Boot zruggfahrt, wo eus cha mitneh und mir uf dere Insle stranded oder zspat in Copacabana achömed und de Bus uf Puno ohni eus abfahrt, verpassemer au de Bus vo Puno nach Cusco, wo mer au scho für de nächschti Tag buecht hend. Das wär ned so toll. No weniger toll für das Päärli, wo am nächschte Tag id USA zrugflügt und das nur wege eus. Paar langi Minute Nervekitzel sind agseid gsi. Schlussendlich hett es Boot euses Boot kennt und dem Bootsfahrer aglüüte, wo eus denn doch no (trotz Umweg) isch cho abhole. Phu, nomal Glück gha!

Copacabana selber, wo de Bus ghalte hett, isch au no herzig. Isch chli en hippsterige Ort mit herzige Kafis und veganem Ässe natürlich ;) Wo mir dete gsi sind, hends grad es riesigs Fescht gha. Copacabana isch ade peruanische Grenze und es sind uh viel Peruaner überecho für das. Sie hend ihri Autos gschmückt und das sell dAutofahrte sicherer mache. Isch e recht grossi Zeremonie gsi wo sie mit Wiirauch und Konfetti das Auto denn iweihed. Mega spannend gsi.

E churzi Busfahrt spöter simmer ade Grenze acho, wo mir all euses Gepäck gno hend zum de Usreisestempel vo Bolivie und de Ireisestempel vo Peru hend chönne go hole. Um die 8i am Abig simmer denn in Puno im Hotel acho.

Chuum hemmer im Hotelzimmer icheckt hani gmerkt, dass au die Unterkunft wieder iischalt isch. DArlette hett vo de Reis sogar Schmerze ide Luftröhre becho und als grossi Schwöschter gspühr ich ihre Schmerz mega guet. Ich bi denn soo verruckt worde, dass mir sit öppe zwei Wuche keis einzigs Mal hend chönne Wärmi gspühre. Weder am Tag no ide Nacht hemmer es Plätzli gfunde zum eus ufwärme. Wie gseid schlaf ich sogar i minere Winterjagge, wo bis zu 0 Grad warm git und ha immerno chalt. Ich für mich chas scho handle, aber wenn ich dArlette gsehne wie sie eifach ned cha gsund werde, wel sie immer am frühre isch und ned mal warm cha dusche bi dere Chälti, denn wird ich truurig und verruckt. Note to self: lerne abgrenze, Jacqueline!

Am nächschte Tag simmer mit Inka Express vo Puno nach Cusco gfahre. Das isch en Bus, wo ned nur vo Ort zu Ort fahrt, sondern au no e Tour inbegriffe hett. 5 Stops hemmer unterwegs gmacht zum au dWelt zwüsche dene zwei Ortschafte chönne kennezlerne.
Mir hend i dem Bus s‘erschte Mal ned gfrohre. Euse Guide hett eus immer nachem Wohlbefinde gfröged und dTemperatur apasst. Mir hend sogar so öppis wie e Stewardess debii gha, wo eus nach jedem Stopp ztrinke abote hett. De Guide hett eus mega viel verzellt gha während de Fahrt und während de Stops und das alles uf Spanisch und Englisch. Ha mega Freud gha, so nochli Spanisch chönne zlerne.

Mir hend zum Biispiel glernt, dass dAndes Berge bim höchschte Punkt afaht, wo mir gsi sind (4‘335 MüM). De Berg nähedra isch sogar 5‘800 Meter hoch. Die tektonische Plattene sind die höchschte uf de Welt nach de Alpe.

Er hett eus au verzellt, dass mis geliebte Quinoa da uf 3‘000-4‘000 MüM apflanzt wird. Au hends Eukalyptus-Bäum vo Tansania importiert, wo anschiinend so viel Wasser bruuched, dass de ganz Bode uströchned. I 5-10 Jahr nähmeds a wird de ganz Bode so troche sii, dass sie nüüt meh chönd abaue.

Mir sind au no Ruine vo de Inkas go aluege. Det wo mir gsi sind, staht nur no 20% vo dem wo mal gsi isch. Vom Machu Picchu staht no 80%. Ha no spannend gfunde, dass die wenig Ruine wo no gstande sind mit enere Mischig us Alpaca-Wolle und Aloe Vera Saft dGebäude wasserdicht gmacht worde sind. Wie chunnt mer nur uf sone Idee? :)
Früehne hend die wichtige Lüüt ide Mitti gwohnt vom Riich. Und je unwichtiger mer gsi isch, desto wiiter usse hett mer gwohnt, mit de Gfahr, vom Feind agriffe zwerde.