La Paz

„Jacqueline, und was hesch so i dine Ferie gmacht?“ - „Frühre.“

Ich ha ja scho gwüsst, dass es im Juli/August Winter isch in Südamerika und ha mi au entsprechend druuf igstellt und warmi Sache packt. Womit ich aber echt ned grechned han, isch dass es au im Zimmer ide Unterkunft no wird chalt sii. Ha ned denkt, dass ich under zwei Wulledeckene no wird frühre - und das jedi Nacht! Ha au ned denkt, dass es ned warms Wasser git zum dusche bi dere Chälti. Han au ned denkt, dass wenn mir extra ines Restaurant gönd zum eus ufwärme, au ide Thermojagge und mit de Chappe dete sitze werded. Ich ha echt ned demit grechned, dass ich tagelang wird durefrüehre ohni mich chönne ufzwärme. Ich wohne sozsäge i mine Strumpfhose, i minere Fake-Daunejagge und minere Chappe, das au währendem schlafe.

Armi Lüüt, wo immer da wohned. DHüüser sind chum isoliert. Was mich im Zimmer schütze sett vor de Chälti dusse isch ei Glasschiebe. Jetzt verstahni au, dNationalfrisur da. Die zwei Zöpfli wo die Fraue da mached, macheds ned jede Tag vo neuem. Die macheds und wäsched denn tagelang ihri Haar ned. Sit mir das in Sinn cho isch, gsehni dass die meischte Fraue fettigi Haar hend. Bi dere Chälti schiined ned mal die Iheimische Luscht zum die lange Haar zwäsche. Es isch so chalt, dass sogar mis Deo igfrohre isch! Ich cha ned mal meh mis Crème-Deo bruuche!

Für mich isch die Chälti scho ok. Ich finde scho en Weg demit zgah. Mir tüend eifach sMami und dArlette Leid, wo sich ned chönd erhole, wel mir immer am reise und am frühre sind. So, gnueg reklamiert! Trotzdem ghörts in Reiseblog, wels en Teil vo de Reis isch.

Zrugg zu La Paz! Mir hend s‘erschte Mal uf dere Reis in La Paz anderi Tourischte gsichted! Da gits sogar Mänsche mit blonde Haar!

La Paz hett die längschti und höchschti Seilnahn vo de Welt. DSeilbahn wird da gnutzt wiene Metro, wo mer biispielswiis au uf die wissi Seilbahn cha umstiige. Wemmer scho bi de Weltrekörd sind, La Paz isch mit 3’650 Meter über Meer die höchschti Hauptstadt vo de Welt. Das gseht mer au so guet, wel mer vo de riese Berge nur no die beschneiti Bergspitze gsehnd. Und ja, mir vergässed nur scho weg de Chälti ned, dass mir hoch obe sind ;) Cha mir gar ned vorstelle, dass dSchwiiz under enere Hitzewelle liided. Mich hetts scho recht überrascht, dass dLüüt scho bi 10 Grad sBedürfnis hend zum Glacé ässe. Es bitzli verstahnis scho, mir hend au eini gno, do as the locals do. Ich glaube, mir ghöred jetzt dezue und hend de Chältetescht bestande :)

Mir hend mal es Seilbähnli gno und hend La Laz chönne vo obe aluege. Da au wie i vielne Länder in Südamerika: Je wiiter ufe mer gaht, desto ärmer wird dBevölkerig. SGegeteil vo eus.

In La Paz gsemmer immer wieder Schuelklassene am üebe für de Nationalfiirtig am 6. Auguscht. Das schiint en riese Event da zsii, wel mir scho mehreri Täg vorher Trommle, Trompete und Füürwerch ghöred. Schad verpassemer de Nationalfiirtig genau um en Tag, aber mir hend ja en chliine Sneak Peak becho :)

No meh hetts mi natürli gfreut, wo dArlette es vegans Reschti für mich gfunde hett. Es isch nur ca. 9m2 gross gsi und es gfundnigs Fresse für dTourischte gsi. Jede Tisch isch bsetzt gsi! Bi mega überrascht wie guet es ide Zwüscheziit gaht zum vegetarisch zlebe da. Finde immer wieder es chliises Schlupfloch und ide Zwüscheziit wirdi nur no halbe komisch agluegt, wenni säge, dass ich kei Fleisch ässe wett. DLüüt schiined sichs gwöhnt zsii.

Zmitzt ide Stadt gits es ganz speziells Gfängnis. Es Gfängnis, wo‘s au die verschiedene soziale Schichte hett, wel sich jede muess sGäld sälber verdiene. Drogebarone und korrupti Politiker hend anschiinend e Luxuszelle im Gfängnis und regiered sozsäge das Gfängnis, während ganz eifachi Kriminelli dWCs gönd go putze. Die riiche Gfangene hends so guet im Gfängnis, dass sie sogar ihri Familie is Gfängnis gholt hend. Isch das ned verruckt?

Usserd die Gschicht mitem Gfängnis, findis nach wie vor mega agnehm zum in Bolivie zreise. Finde dLüüt so lieb! Ha sGfühl, dass sie es mega grosses Herz hend. Sie würked au glücklich uf mich. Glücklicher als die Lüüt in Südoschtasie, wo all Tourischte wend über de Tisch zieh und eim Sache wend ufdrucke und eim nahrüefed und eim fascht zwinged zum öppis chauffe und verruckt werded, wenn mer‘s ned macht. Da muemmer ned mal verhandle! Einisch hani 10 bolivianischi Bolivar anstatt 1 bolivianische Bolivar (mue immer schmunzle bi dere Währig :)) und has ned gmerkt und trotzdem hends mir sGäld zrugg geh! Und woni Stülpe kauft ha und nur 1 bolivianische Bolivar meh ha welle geh als Trinkgeld, hetts die Frau gar ned welle aneh. Ich fühle mich echt wohl i dem Land. Sicher und willkomme.